كوني حرة

الموضوع ابتدى لما كنت صغيرة ، كل ما افكر في حاجة و اسأل فيها يكون الرد ممنوع أو حرام ، كل ما أحب أعمل حاجة يكون الرد مايصحش ، كل ما اضحك يتقاللي عيب تضحكي بصوت عالي ،، كل ما اتكلم يتقاللي وطي صوتك !! كنت طفلة صحيح و مش مدركة حاجات كتير بس كنت حاسة اني متكتفة ، اني مش ملك نفسي 

و لما ابتديت أكبر و يكون ليا شخصيتي و صوتي رجعت اسأل أهلي و كل اللي حواليا انتوا ليه كنتوا بتعملوا معايا كده ، يكون الرد بنربيكي أو خايفين عليكي أو الصغيرين لازم يسمعوا الكلام 

و كل ما كنت بكبر أكتر كل ما الحواجز كانت بتزيد أكتر .. و كانت بتزيد جوايا رغبة اني عاوزة اكسر القيد ده و اني في عالم مش بتاعي 

هتكلم بصفتي بنت ، كان ممنوع أخرج لوحدي ، كان ممنوع أتأخر برة عن الساعه 9 ، كان ممنوع أضحك في الشارع ، كان ممنوع صوتي يعلى ، كان ممنوع أحضر ندوات ثقافية ، كان ممنوع أمثل او أغني ، حاجات كتير اوي من حق الانسان العادي ممارستها بس ماكانتش من حقي ، 

زي اي بنت ، كان بيمارس عليا اساليب كتير من القمع ، زي الحجاب لما اتفرض عليا ، زي الجواز لما اتفرض عليا في وقت ماكنتش عاوزاه، زي نوع الدراسة لما اتفرض عليا و غيرته من ورا أبويا ، زي شكل اللبس و حتى ألوانه ، زي طريقة الكلام و طريقة الهزار 

يااااه ... حاجات كتير جدا .. و تحت اسم الدين أو الأخلاق او او او و كلها في نظري مالهاش علاقة 

المجتمع عايش كله بيضحك على بعضه .. الأم و الأب عاوزين بنتهم تدخل كلية من اللي بتاخد أعلى مجموع عشان بس الناس تقول دي بنتهم دكتورة و لا مهندسة  بغض النظر عن هي بقى عاوزة تدرس ايه ، و يا سلام بقى لو الدراسة اللي هي عاوزاها برة المدينة اللى هم ساكنين فيها، يبقى في المشمش ياختي ده انتي تعدي تمسحي و تكنسي أحسن .. 

الأهل عاوزين بنتهم تتجوز أحسن واحد و أغنى واحد و أشيك واحد بغض النظر بقى عن هي بتحب مين و اللي حظها حلو يطلع الانسان اللي هي حبته مطابق لمواصفات الاهل و اللي غير كده يبقى يومها اسود 

الأهل عاوزين البنت تبقى صوتها واطي بتمشي ماحدش يشوفها ولا يحس بيها و الا تبقى عاوزة تلفت النظر ليها و تبقى بنت مش محترمة و مايصة .. ماحدش بيشوف انها مجرد انسان من حقه يعبر عن مشاعره بالشكل اللي مريحه من حقه يمشي و يتكلم و يضحك و يرقص و يعمل كل اللي هو عاوزه !!

كل إنسان ماشي بيتظاهر بحاجة و جواه رغبات تانيه خاااااالص ، عشان بس كل انسان بيعبد كلام الناس ، و في النهايه كلهم عبيد لبعض !! و ماحدش مرتاح و عايش نفسه بجد !! 

انا ماوجهتش كلامي للولاد عشان الولاد عندهم فرصة اكبر انهم يستقلوا لاننا فى مجتمع ذكوري ، معظم الأهالي مابتقولش للولد انت بتعمل ايه و رايح فين و جاي منين و روح ايه و ادرس ايه و البس ايه .. ده قليل اوي مع الولاد

انا اللي حصل معايا ان بعد مواقف كتير اوي من دي كبر جوايا احساس اني لازم ابقى ملك نفسي ، لازم شكلي يعبر عني ، و ضحكتي و كلامي يعبروا عني ، واللي بعمله و بدرسه في حياتي يعبرو عني و الانسان اللي بشاركه حياتي عيبر عني 

و ده كله صعب اوي في وجود الأهل أو بمعنى ادق في وجود سلطة الأهل 

فكان لازم اكسر القيود دي

حد هيسألني و ازاي عملتي كده و انتي بنت ؟ و روحتي فين و عيشتي ازاي و عملتي ايه !! مليون سؤال بيدور في ذهن كل حد 

انا حطيت هدف في دماغي اني لازم استقل بنفسي ، يكون عندي بيت بتاعي من غير اهلي ، و حياة مستقله تماما عن اهلي 

الهدف ده فضلت اشتغل عليه سنين من غير ما حد يحس .. كنت بشتغل في حاجات كتير اونلاين و كنت بصمم كروت بيزنيس و دعوات افراح و حاجات اقدر اعملها من البيت من غير ما حد يحس .. عشان اجيب الفلوس اللي تخليني اقوى و تخليني اقدر استقل .. كل بنت تقدر تعمل حاجات كتير مختلفة في بنت تقدر تصمم اكسسوارات و تبيعها 

في بنت ممكن تطبخ اكل و تبيعه .. اللي بتعرف تعمل اي حاجه هتقدر تستغلها صح عشان تعمل اللي بتحلم بيه بس اهم حاجه الارادة 

اول ما سبت البيت و استقليت طبعا في ناس كتير بكنلهم كل الحب و الاحترام وقفوا جنبي لما كنت لوحدي

واجهت اضطهاد كبير جدا من المجتمع لمجرد اني بنت عايشة لوحدها، و مرة مديري طردني من الشغل عشان عرف بردو اني عايشه لوحدي

دورت على شغل و اشتغلت حاجه مابحبهاش ابدا بس بعرف اعملها 

اشتغلت في كول سنتر و خدمة عملا ..كانت شغلانه مملة جدا بس حسيت فيها بنفسي عشان بصرف على نفسي  لحد ما قدرت في النهاية اشتغل في المجال اللي بحبه

تاني حاجة سحبت ورقي من كليتي و قررت ادرس حاجه بحبها بعد 5 سنين قضيتهم في هندسة قررت ارميهم في الارض مقابل اني احقق اللي عاوزاه 

الحياه مش سهلة و واجهت و هواجه صعوبات كتير اوي بس ايماني بنفسي هيخليني اعديها 

انا دلوقتي و انا بمثل نفسي بدون اي نفاق او وشوش او تنكر بقدر انتج احسن حاسه اني عايشة بجد مش مدفونة بالحيا .. ليا حياتي و اهدافي و ناسي و كل حاجة ..

انا شخصيا سبت اهلي عشان كان في بيننا مشاكل بس مش معنى كده اني بقول ان بس اللي عندهم مشاكل هم اللي مفروض يستقلوا عن اهاليهم .. لا بالعكس انا شايفه ان اي انسان مفروض عند سن معين يستقل عن أهله عشان يقدر ينجح و يعتمد على نفسه و يكون حر نفسه تماما و هيكون حظه حلو اللى اهله متفتحين و قادرين يقبلوه و هو مستقل عنهم ، و هيكون حظه أحلى اللي أهله مش قابلينه لأنهم في الحالة دي هيكونوا أهل متسلطين و اريحله انه يخلص من جحيمهم

الحرية قيمة كبيرة اوي من اهم و اسمى قيم الانسانية و الحياه 

الانسان بدون حريته مش انسان انما مجرد عروسة ماريونيت في ايد شخص بيحركها او مجتمع كامل بيحركها عمرها ما هتنتج ولا تتحرك غير في الإطار اللي مسموح ليها بيه 

و عشان الحرية من اسمى القيم فأكيد تستحق ندفع عشانها كتير من عمرنا و مجهودنا و وقتنا و شجاعتنا مهما كلفنا الأمر .. كوني حرة و اتخلصي من اي قيد و كل ما تكسري قيد هتكتشفي انه كان ولا حاجة و هتلاقي نفسك بتقوي اكتر و بتكسري قيود اكتر و اكتر لحد
ما تتقابلي في النهاية مع نفسك زي ما بتتمنيها .. كوني حرة

By: Sahar Maher El-Issawi