2012
Tina and Sandy William
Nervana Samy
حلقة صباحك يا مصر بحكي فيها الي حصلي في العيد
Asma Elhagrassy
النهاردة كان محضر فى القسم مرفق فيه وثائق و الرسايل اللى انت كتبتهالى و اقوالى فى النيابة .. المرة الجاية هاطلع على المحامى العام يا خفيف، هابعتلك رقم المحضر علشان تقدر تتابع خط السير فى مباحث الإتصالات :)
متبقاش تعمل فيها فِتِك يا باشمهندس
ملحوظة : أمك إسمها حنفى
Lamya Lotfey
النهارده عملت اول محضر تحرش فى حياتى ضد سواق تاكسى ورغم مرارة التجربة السخفة لكن حاسه انى قوية وسعيده باصحابى اللى دعمونى ربنا يخلكم ليا
Mema Abdeen
انا كنت ماشية انا واخواتى جنب كلية فنون تطبيقية واحنا ماشيين جه واحد ادامنا وساب الشارع كله وجاى يعدي من وسطنا اختى بعدت وانا كنت ماشية فى النص واتحركت بعيد عنه عشان كنت عارفة انه جاى يتحرش بردو قرب عليا ومد ايده انا زقيت ايده راح بردو مدها رحت مسكت فيه راح جرى وجريت وراه وبعدين ملحقتوش رحت صرخت وقلت حرامى كان فيه امناء شرطة واقفين جريوا وراه ولما سالونى عملك ايه قلتلهم اتحرش بيا راح قالولى بس اضطريت اكدب واقول انه سرقني المهم اللى جريوا وراه مسكوا وندهونى اتعرف عليه ولما رحت لقيت الامناء واهالى ماسكينو وسالونى عملك ايه قلتلهم اتحرش بيا قالولى بس؟؟؟!!!! كانه مش مهم انه اتحرش وكانه عادى قلتلهم لا وسرق موبايلي كمان
بعدين شد معاهم وشدوا معاه بسبب الموبايل بس وضربوه ورحنا القسم بعد كده اضطريت اقول للظابط انه سرقنى واتحرش وعملت محضر بكده (انا كنت فاكرة انى ممكن اتنازل عن موضوع السرقة وعادى هيتنسي) جه بابا وماما على القسم وكانوا عايزين اتنازل ومعملش محضر وبيقولولى كفاية انه اتضرب الظابط قالهم لا ليه تتنازلوا عن حق بنتكو والحمدلله انا كنت عملت المحضر انا مكلمتهمش غير لما كنت ضمنت انهم مش هيقدروا يخلونى اتراجع ولما روحت البيت قعدوا يقولولى انه هيسلط ناس عليا وانى لازم اتنازل
رحت تاني يوم النيابة وقلتلهم انى لقيت الموبايل وانى عايزة اتصالح واتنازل عن المحضر كله رئيس النيابة قالى انتى كده بتضيعي حقك وحق اخواتك لو كنتى خايفة عليهم فعلا ووكيل النيابة قالى نفس الكلام وقالى ان السرقة مفيهاش تصالح يعنى هيتسجن هيتسجن رحت قلتله الحقيقة وانه مسرقش وانى اضطريت اقول كده عشان يمسكوه لانهم لما عرفوا الموضوع تحرش بس كانوا هيسيبوه وانى مستعدة اتحمل تهمة البلاغ الكاذب راح كتب دا فى المحضر وقالى مش هنوجهلك تهمة ولا حاجة انتى كنتى مضطرة وقالى اوعى تتنازلى عن حقك
انا اضطريت اكدب على اهلى واقولهم انى تنازلت ووكيل النيابة خد رقم المحامى وقالى هنتواصل معاكى عن طريقه
رقم المحضر 10529 جنح الدقى
Amira Ibrahim
أنا أميرة .. صحفية في موقع بص وطل
أنا مبسوطة جدا بدينا عماد وبكريستين وبكل بنت جدعة قررت إنها تدافع عن حقها ومتستهونش بيه
على فكرة أنا حصلتلي حادثة تحرش بعد دينا عماد بأسبوع تقريبا.. واحد اتحرش بيا في الشارع وساعتها جاتلي حالة هستيرية.. قعدت أصوت وأصرخ وأشتمه بعلو صوتي وطلعت أجري وراه ومسكته وضربته.. والناس اتلمت وكان في ولدين بس هما اللي وقفوا معايا وساعدوني وضربوه معايا والباقيين كانوا كلهم بيلوموني إني بشتمه وبضربه..
المهم الكلام ده كان في ألف مسكن ساعتها كان في نقطة شرطة هناك رحناها وبعدين طلعنا على قسم عين شمس وعملتله محضر تحرش جنسي ومن القسم طلعنا على النيابة والحيوان ده دلوقتي محبوس على ذمة التحقيق
الحقيقة أما رحت القسم والنيابة مكنتش متخلية إن أنا في قسم شرطة حقيقي.. أنا عمري ما دخلت قسم شرطة ولا عمري رحت النيابة بس.. كلهم هناك كانوا بيعاملوني معاملة كويسة جدا و بمنتهى الاحترام وأمين الشرطة اللي كان بياخد أقوالي قعد يقول لي جدعة على الله البلد تنضف من الوساخة اللي فيها دي.. وأما رحت النيابة وكيل النيابة وأنا بحكيله على اللي حصل .. قعد يقولي أصلي
وقعد يقولولي جدعة والله.. وساعتها سألني إنتي بتشتغلي إيه.. فأما قلتله صحفية ضحك وقالي عشان كده.. وقالي سمعتي عن دينا عماد .. قلتله آآه قالي على فكرة هو ده الصح لما كل واحدة فيكوا كده تقرر إنها متسيبش حقها كده البلد هتنضف بجد..
كلامه ساعتها بسطني جدا.. وأكدلي إن إحنا صح.. وأنا دلوقتي متفائلة جدا إن إحنا نقدر نعمل حاجة بجد.. عشان كل واحد بيفكر يتحرش.. يفكر ألف مرة قبل ما يعمل أي حاجة
على فكرة أنا محجبة وأنا مؤمنة جدا إن الموضوع مش فارق بالنسبة للشخص المتحرش أو (في أقوال أخرى) الحيوان المتحرش لأننا مينفعش نقول عليه إنسان الفكرة عنده إنه عايز يتحرش بأي بنت وخلاص محجبة أو مش محجبة مش هتفرق معاه المهم إنه يعمل اللي في دماغه وخلاص..
وعلى فكرة نسبة المحجبات اللي بيتحرشوا بيهم أكتر بكتير من نسبة البنات المش محجبة.. وأي حد بيرجع الموضوع للبس أو الحجاب أو عدمه فده حد غبي ومتخلف.. لإن الناس زمان أيام الستينات والسبعينات مكنش في حاجة عندهم اسمها حجاب أصلا ومكنش حد فيهم بيتعرض لحادثة تحرش واحدة..
Rahma Mohammed
"ده الحيوان الكلب اللى حاول يقل ادبه ويسفل ويتحرش ببنات الناس
ده كان مصيره ....
الكلابشات فى ايديه لما فكر انه يعمل كده معايا
انا كان ممكن اسيبه واتصالح
لكن انا صممت اعمله محضر ويتاخد على النيابة علشان هو والكلاب اللى زيه يعرفوا ان بنات الناس مش لعبة
وان اى كلب فيهم هيحاول يتطاول هيتعاقب .ومن هنا ورايح البنات مش هتسكت وهيجرجروا اى حيوان هيتطاول علينا على القسم .
انا مكنتش عايزة أاذيه او اضيع مستقبله بس هو اللى اضطرنى اعمل كده"
Christine Leon
Deena Emad
2008
Noha Roshdy
